Hyang Yesus Ngicen Ajengan kapining Limang Tali (5.000) Diri Anak
6
Sasampun paindikane punika,
Hyang Yesus kasarengin para sisian Idane nyebrang Danu Galilea sane pada kasambat Danu Tiberias.
2 Tur akeh anake ngiring Ida krana ipun sami sampun nyingakin paindikan sane ngangobin sane kakaryanin olih Hyang Yesus buat para anak sungkan.
3 Irika raris,
Hyang Yesus munggah ka bukite tur malinggih irika sareng para sisian Idane.
4 Duk punika sampun nampek rarainan Paskah anak Yahudine.
5 Ritatkala Hyang Yesus macacingak irika,
Ida manggihin anake akeh ngrauhin Ida.
Raris Ida ngandika kapining I Pilipus sapuniki,
“Dija jani iraga meli rotia buat anake makejang ene apanga nyidang madaar?”
6 Hyang Yesus sampun uning napi sane jagi laksanayanga.
Ida mataken sekadi punika buat nguji kapracayaan I Pilipuse.
7 I Pilipus raris matur sapuniki,
“Guru,
yening iraga madue jinah upah makarya kutus bulanb,
masih nenten genep anggen numbas roti buat anake akeh iriki yadiastun sebilang diri kaedumang paduma akidik.”
8 Irika raris sisian Idane,
inggih punika I Andreas semeton I Simon Petrus,
matur sapuniki,
9 “Iriki wenten adiri anak alit makta rotic limang bungkul lan ulam kalih ukud.
Nanging napike gunane buat anake akeh iriki?”
10 Raris Hyang Yesus ngandika sapuniki,
“Tunden ja anake liu ento negak.”
Ring genahe punika akeh wenten entikan padang;
irika anake akeh malinggih.
Anake akeh punika sawetara limang tali (5.000) diri anak lanang,
dereng kapetek anak istri lan alit-alit.
11 Raris Hyang Yesus ngambil rotine punika,
tur ngaturang penyuksma ring Sang Hyang Pengardi.
Ida raris ngedum-edumang rotine ring anake akeh sane malinggih irika.
Sekadi punika Ida taler ngedum-edumang ulame.
Raris anake makasami ngajeng kantos wadih.
12 Sasampune ipun sami pada wareg,
Hyang Yesus ngandika kapining para murid Idane sapuniki,
“Punduhang ja roti ane masisa,
apang tusing kanti makutang!”
13 Raris ipun sami munduhang sisan-sisan rotin anake sane ngajeng irika kantos polih roras penarak.
14 Ritatkala anake akeh punika nyaksiang paindikan ngangobin sane kakaryanin olih Hyang Yesus,
ipun sami mabaos sapuniki,
“Anake puniki yakti Sinoman sane kajanjiang sane jagi rauh ring jagate!” Pengeling-eling 18:18
15 Hyang Yesus uning yening ipun sami jagi maksa Ida mangda dados rajan ipune.
Punika mawinan Hyang Yesus matilar jagi nyepi praragan ring bukit sane lianan.
Hyang Yesus Mamargi ring Duur Toyane
16 Ritatkala nyaluk peteng,
para sisian Hyang Yesuse tedun ka pasisir danune.
17 Ipun sami raris menek jukung tur ngawitin nyebrang danune punika nuju ka Kota Kapernaum.
Ritatkala sampun wengi,
Hyang Yesus dereng rauh nyarengin ipun sami.
18 Duk punika,
angine baret pisan sane mawinan ombake ring danune dados ageng.
19 Sasampune nayung praune sawetara lima utawi nem kilometer adohnyane,
ipun sami nyingakin Hyang Yesus mamargi ring duur toyan danune nampekin jukunge.
Raris ipun sami pada jejeh pisan.
20 Nanging Hyang Yesus ngandika kapining ipun sami sapuniki,
“Eda ja jejeh!
Ene Tiang!”
21 Sasampune Hyang Yesus ngandika sekadi punika,
para sisian Idane seneng nerima Ida ring jukunge.
Jeg pramangkin jukunge punika rauh ring genah sane katuju.
Anake Akeh Ngrereh Hyang Yesus
22 Benjangane,
anake akeh sane kari meneng ring dangin Danu Galileane,
nyingakin ring tepin danune nenten wenten jukung.
Ipun sami inget yening dugas dibi wantah wenten jukung asiki,
tur ipun uning para sisian Idane kamanten sane luas nganggen jukunge punika;
Hyang Yesus nenten nyarengin para sisian Idane.
23 Raris wenten makudang jukung saking Kota Tiberias ngungsi ka pasisir pasihe sane nampek ring genah anake akeh ngajeng roti,
sasampun Hyang Yesus ngaturang suksma.
24 Ritatkala anake akeh punika nenten manggihin Hyang Yesus lan para sisian Idane irika,
ipun sami raris numpang jukung-jukunge punika nuju Kota Kapernaum jagi ngrereh Hyang Yesus.
Hyang Yesus puniki Roti sane Ngicenin Urip
25 Ritatkala anake akeh punika manggihin Hyang Yesus ring pasisi kauh Danu Galileane,
ipun mataken ring Ida sapuniki,
“Guru!
Pidanke Guru rauh iriki?”
26 Hyang Yesus raris masaur sapuniki,
“Tiang ngandikayang sane patut,
sujatine ragane ngrereh Tiang,
nenten ja krana ragane ngerti artin paindikan sane ngangobin sane karyanin Tiang,
nanging krana ragane sampun ngajeng rotine punika kantos wareg.
27 Sampunang ja makarya mangda ngamolihang ajengan sane jagi telas lan gelis berek.
Nanging makarya ja mangda ngamolihang ajengan sane nenten prasida berek,
inggih punika sane ngicenin urip sane sujati salamin-laminne.
Ajengan punika jagi kapicayang olih Tiang,
Sang Putraning Manusa,
kapining ragane,
krana Tiang sampun kalantik olih Sang Hyang Aji,
Pengardin iraga.”
28 Raris anake akeh mataken kapining Hyang Yesus sapuniki,
“Pakaryan napike sane sapatutne laksanayang titiang mangda manut sekadi pikayunan Sang Hyang Pengardi?”
29 Raris Hyang Yesus nyaurin ipun sapuniki,
“Pakaryan sane manut pikayunan Ida punika nenten tios,
pracaya ja kapining Tiang sane kautus olih Sang Hyang Pengardi.”
30 Anake akeh punika matur sapuniki,
“Yening sekadi punika,
bukti napike sane karyanin Guru mangdane titiang sami nyingak lan pracaya ring Guru?
Napike sane jagi laksanayang Guru?
31 Idumun,
leluhur iraga ngajeng roti sane madan ‘roti mana’ ritatkala kapimpin olih dane Musa ring genah sane bengang linggahd.
Wenten katulis saking Cakepan Sucine,
‘Ipun sami kicen roti saking swarga mangda kaajeng.’”
32 Raris Hyang Yesus ngandika ring ipun sami sapuniki,
“Tiang ngandikayang sane patut,
sujatine nenten ja dane Musa sane ngicenin rotine punika idumun,
nanging Ajin Tiange.
Tur mangkin,
Ida ngicenin roti sane sujati saking swarga kapining ragane.
33 Krana roti sane kapicayang olih Sang Hyang Pengardi inggih punika,
Anak sane tedun saking swarga jagi mapaica urip kapining manusane ring jagate.”
34 Raris ipun sami matur malih sapuniki,
“Jero,
setata ja icen titiang sami rotine punika.”
35 Hyang Yesus ngandika ring ipun sami sapuniki,
“Tiang niki roti sane ngicen urip.
Sapa sira ja sane rauh ring Tiang,
ipun nenten jagi seduk malih.
Lan sapa sira ja sane pracaya kapining Tiang,
nenten jagi bedak salamin-laminne.
36 Nanging Tiang sampun ngandikayang kapining ragane,
indik ragane nenten pracaya yadiastun ragane sampun nyingakin Tiang.
37 Makasami anake sane kaserahang olih Sang Hyang Aji sid Tiange,
jagi ngrauhin Tiang.
Tiang nenten ja jagi nundung sapa sira sane ngrauhin Tiang.
38 Krana Tiang tedun saking swarga,
boya ja mangda nglaksanayang pikayunan Tiange,
nanging mangda nglaksanayang pikayunan Sang Hyang Aji sane ngutus Tiang.
39 Pikayunan Idane sane ngutus Tiang sapuniki:
Saking anake makasami sane kaserahang sid Tiange,
asiki ja nenten jagi ical.
Samaliha mangdane Tiang nguripin malih anake punika ritatkala dinane pamuput,
inggih punika dinane manusane jagi kaakimin.
40 Krana pikayunan Sang Hyang Aji sapuniki:
makasami sane nyingakin Sang Putra lan pracaya ring Ida jagi ngamolihang urip sane sujati salamin-laminne.
Tur Tiang jagi nguripin ipun sami malih ritatkala dinane pamuput punika.”
41 Irika raris para anak Yahudine pada ngamigmig indik Hyang Yesus krana Ida ngandika,
“Tiang niki Roti sane tedun saking swarga.”
42 Ipun sami ngamaosang,
“Boyake Yesus ene pianakne dane Yusup?
Iraga nawang reramane!
Ngudake Ia bani ngorahang dewekne ‘Tiang tedun saking swarga?’”
43 Raris Hyang Yesus ngandika sapuniki,
“Sampunang ja ragane pada ngamigmig.
44 Nenten wenten anak sane rauh ring Tiang,
yening nenten katuntun olih Sang Hyang Aji sane ngutus Tiang.
Kenten pada Tiang jagi nguripin malih anake sane rauh ring Tiang ritatkala dinane pamuput punika.
45 Ring Cakepan Sucine sampun katulis olih para Sinoman Sang Hyang Pengardine sapuniki,
‘Samian anake jagi kaajahin olih Sang Hyang Pengardi.’e
Sapa sira ja sane mirengin tur nerima pengajahan saking Sang Hyang Aji,
ipun jagi rauh sid Tiange.
46 Nenten ja wenten anak sane sampun nyingak Sang Hyang Aji lianan kapining Tiang sane rauh saking Sang Hyang Pengardi.
Wantah Tiang sane sampun nyingakin Ida.
47 “Tiang ngandikayang sane patut,
sujatine sapa sira ja sane pracaya kapining Tiang,
ipun madue urip sujati salamin-laminne.
48 Tiang niki roti sane ngicen urip.
49 Leluhur ragane ngajeng roti mana ring genah sane bengang linggah punika,
nanging ipun sami tetep padem.
50 Sekadi asapuniki ciri roti sane tedun saking swarga:
sapa sira ja sane ngajeng rotine puniki nenten ja jagi padem.
51 Tiang niki roti sane ngicen urip,
inggih punika roti sane tedun saking swarga.
Sapa sira ja sane ngajeng rotine puniki jagi ngamolihang urip salamin-laminne.
Rotine puniki nenten tios daging Tiange sane kapicayang mangda jagate ngamolihang urip.”
52 Mirengin pengandikan Hyang Yesuse punika,
para anak Yahudine pada maiegan saha ngamaosang,
“Kenkenke carane Ia maang dagingne padidi teken iraga apanga daar iraga?”
53 Raris Hyang Yesus ngandika ring ipun sami sapuniki,
“Tiang ngandikayang sane patut,
sujatine yening ragane nenten ngajeng daging Tiange,
Sang Putraning Manusa,
lan nenten nginem rah Tiange,
ragane yakti nenten ja urip.
54 Anake sane ngajeng daging Tiange lan nginum rah Tiange madue urip sujati salamin-laminne.
Tur ipun jagi kauripang malih ritatkala dinane pamuput punika.
55 Krana daging Tiange nenten tios ajengan sane sujati,
lan rah Tiange inuman sane sujati.
56 Sapa sira ja sane ngajeng daging Tiange lan nginem rah Tiange,
ipun setata masikian sareng Tiang,
lan Tiang setata masikian sareng ipun.
57 Sujatine,
Sang Hyang Aji sane ngicen urip punika ngutus Tiang tur Tiang maurip krana Sang Hyang Aji.
Kenten pada sapa sira ja sane ngajeng daging Tiange,
ipun maurip krana Tiang.
58 Tiang puniki roti sane tedun saking swarga,
sane malianan kapining roti mana punika.
Yadiastun leluhur ragane ngajeng roti manane punika,
ipun sami tetep padem.
Nanging sapa sira ja sane ngajeng roti puniki,
ipun jagi maurip salamin-laminne.”
59 Makasami paindikane punika kanikayang olih Hyang Yesus ritatkala Ida ngajahin ring bale wantilan agama Yahudine ring Kota Kapernaum.
Akeh Sisiane sane Ngalain Hyang Yesus
60 Sasampune mirengin pengandikan Hyang Yesuse punika,
akeh saking pengiring Idane mabaos sapuniki,
“Pengajahane ene keweh sajan.
Nyen ke ane nyidang nerima?”
61 Hyang Yesus uning para pengiring Idane pada ngamigmig indik pengajahan Idane.
Raris Ida ngandika sapuniki,
“Napike pengajahan Tiange ngranayang ragane bimbang?
62 Kenken papineh ragane yening benjangan nyingakin Sang Putraning Manusa mawali munggah ka genah Idane idumun?
63 Roh Sang Hyang Pengardi sane ngranayang manusane maurip.
Bayun manusane nenten ja wenten gunane.
Makasami pengajahan sane nikayang Tiang kapining ragane madaging kuasan Roh Sang Hyang Pengardi sane ngicen urip sujati buat ragane.
64 Nanging saking ragane sami puniki,
wenten sane nenten pracaya.”
Hyang Yesus sampun uning saking pengawitne sapa sira sane nenten pracaya,
tur sira sane jagi nyerahang Ida kapining para penguasa.
65 Hyang Yesus ngandika malih sapuniki,
“Punika mawinan Tiang ngandika kapining ragane sami,
‘Nenten wenten anak sane mresidayang rauh sid Tiange yening nenten kapicayang olih Sang Hyang Aji.’”
66 Sasampun paindikane punika,
akeh pengiring Idane ngalain Ida;
ipun nenten malih ngiring Ida.
67 Raris Hyang Yesus mataken kapining makaroras sisian Idane sapuniki,
“Apake ragane masih makeneh ngalain Tiang?”
68 I Simon Petrus raris matur sapuniki,
“Ratu,
kapining sirake titiang sami jagi luas?
Pengajahan Iratune ngicen urip sujati salamin-laminne.
69 Titiang sami sampun pracaya tur uning yening Iratu puniki nenten tios utusan sane suci saking Sang Hyang Pengardi.”
70 Hyang Yesus raris ngandika sapuniki,
“Boyake Tiang ane milih ragane makaroras ene?
Sakewala ada adiri uli ragane mabesikan ajak ratun para setan.”
71 Tatuek pengandikan Idane nenten tios I Yudas,
okan dane Simon Iskariot.
Yadiastun I Yudas salah tunggal saking makaroras sisian Idane,
nanging ipun sane jagi nyerahang Hyang Yesus kapining para penguasane.